حضورؐ کی تعلیمات کی پیروی سے حقیقی فلاحی معاشرہ کی تشکیل ممکن ہوسکتی ہے ،وزیراعلیٰ جام

حضورؐ کی تعلیمات کی پیروی سے حقیقی فلاحی معاشرہ کی تشکیل ممکن ہوسکتی ہے ،وزیراعلیٰ جام

• November 20, 2018, 10:56 pm
• National News
• 88 Views

کوئٹہ(خ ن) وزیر اعلیٰ بلوچستان جام کمال خان نے یوم ولادت النبیؐ کے مبارک موقع پر تمام مسلمانوں کو مبارکباد پیش کی ہے، اپنے ایک تہنیتی پیغام میں وزیراعلیٰ نے کہا ہے کہ آج کا دن صرف مسلمانوں کے لئے ہی نہیں بلکہ پوری کائنات اور انسانیت کے لئے عظیم دن ہے کہ آج حضرت محمدؐ رحمتہ اللعالمین بن کر اس دنیا میں تشریف لائے اور ان کی آمد سے دنیا سے جہالت کی تاریکی کے خاتمے کی ابتدا ہوئی، اس مبارک دن پر نبیؐ کے اسوہ حسنہ کی مکمل پیروی، اتحاد واتفاق اور برداشت کا جذبہ پیدا کرنے کے عزم کی ضرور ت ہے، وزیراعلیٰ نے کہا کہ یہ دن مسلمانوں کے لئے خاص اہمیت کا حامل ہے اور یہ ہماری خوش بختی ہے کہ ہم اس ہستی کی امتی ہیں جسے خالق کائنات نے تمام جہانوں کے لئے رحمت بناکر بھیجا، انہوں نے کہا کہ امتی ہونے کے ناطے ہمیں اسوہ حسنہ کی مکمل پیروی کرتے ہوئے اپنے اندر اتحاد، عفو ودرگزر، برداشت، مذہبی رواداری جیسے اوصاف کو مزید فروغ دینا چاہئے، انہوں نے کہا کہ حضورؐ کی تعلیمات پر عمل پیرا ہوکر دنیا وآخرت میں کامیابی حاصل کی جاسکتی ہے اور حقیقی فلاحی معاشرہ کی تشکیل ممکن ہوسکتی ہے، وزیراعلیٰ نے کہا کہ ہم سیرت النبیؐ اور سنت رسول ؐپر عمل پر پیرا ہوکراپنی دنیا وآخرت سنوارسکتے ہیں اور اس وقت امت مسلمہ کو جن مشکلات ومصائب کا سامنا ہے ان سے حضور ؐ کی تعلیمات پر عمل پیرا ہوکر ہی نمٹاجاسکتا ہے،وزیراعلیٰ نے دعا کی ہے کہ اللہ تعالی ہمیں سیدھے رستے پر چلنے اور اپنی زندگیاں حضور ؐ کے بتائے ہوئے ضابطہ حیات کے مطابق ڈھالنے کی توفیق عطافرمائے، اور پاکستان کو صحیح معنوں میں ایک اسلامی فلاحی مملکت اور ترقی وخوشحالی کا گہوارہ بنادے۔ دریں اثناء وزیر اعلیٰ بلوچستان جام کمال خان نے عیدمیلادالنبی کے موقع پر جلوسوں اور اجتماعات کو مکمل سیکیورٹی کی فراہمی اور امن وامان کی صورتحال برقرار رکھنے کے لئے بھرپور اقدامات کرنے کی ہدایت کی ہے، وزیراعلیٰ نے آئی جی پولیس، ضلعی انتظامیہ اور قانون نافذ کرنے والے دیگر اداروں کو کوئٹہ سمیت صوبہ بھر میں سیکیورٹی کے فول پروف انتظامات کو یقینی بنانے کی ہدایت کرتے ہوئے کہا ہے کہ تمام متعلقہ ادارے مستعد اور چوکس رہتے ہوئے باہمی روابط قائم رکھیں، وزیراعلیٰ نے محکمہ بلدیات اور میٹروپولیٹن کارپوریشن کو شہر میں صفائی کے خصوصی اقدامات کرنے کی ہدایت بھی کی ہے،