جعلی دستاویزات پر افغان باشندہ گرفتار، لاہور ایئرپورٹ پر مسافر سے چرس برآمد

جعلی دستاویزات پر افغان باشندہ گرفتار، لاہور ایئرپورٹ پر مسافر سے چرس برآمد

• January 30, 2020, 12:10 pm
• National News
• 156 Views

اسلام آباد: اسلام آباد ائیر پورٹ پر پی آئی اے ویجلینس نے کارروائی کرتے ہوئے جعلی دستاویز پر کینیڈا جانے والے افغانی باشندے کو حراست میں لے لیا، لاہور ایئرپورٹ پر اے ایس ایف نے منشیات اسمگل کرنے کی کوشش کرنے والے ملزم کو گرفتار کر لیا۔

تفصیلات کے مطابق جعلی دستاویزات پر گرفتار ہونے والا افغان مسافر پی آئی اے کی پرواز پی کے 781 کے ذریعے اسلام آباد سے ٹورنٹو جا رہا تھا، پی آئی اے کے ویجلینس افسر نے مسافر میر زادہ سے سفری دستاویزات طلب کیے، افسر کو شک ہوا کہ دستاویز جعلی ہے۔

ویجلینس افسر نے شک ہونے پر ایف آئی اے سے مسافر کے سفری دستاویز کی تصدیق کرائی تو کینیڈا ریزیڈنٹ کارڈ جعلی نکلا، جس پر مسافر کو آف لوڈ کر دیا گیا، بعد ازاں ویجلینس افسر نے مسافر کو مزید قانونی کارروائی کے لیے ایف آئی اے ایمگریشن کے حوالے کر دیا، ایف آئی اے نے مسافر کو اپنی تحویل میں لے کر مزید تفتیش کے لیے سیل منتقل کر دیا۔


دوسری طرف اے ایس ایف نے علامہ اقبال ائیر پورٹ پر منشیات اسمگلنگ کی کوشش ناکام بنائی، لاہور سے دوحہ جانے والے مسافر سے چرس برآمد کی گئی، اے ایس ایف ذرایع نے بتایا کہ گجرانوالہ کا رہایشی محمد اصغر نجی پرواز سے دوحہ جا رہا تھا۔

اے آر وائی نیوز کے مطابق اے ایس ایف نے دوران چیکنگ مسافر کے جوتوں سے 850 گرام چرس برآمد کی، جس پر اے ایس ایف نے مسافر کو قانونی کارروائی کے لیے اینٹی نارکوٹک فورس (اے این ایف) کے حوالے کر دیا۔