حکومت بلوچستان کا پبلک ٹرانسپورٹ کھولنے کا اعلان

حکومت بلوچستان کا پبلک ٹرانسپورٹ کھولنے کا اعلان

• June 7, 2020, 11:57 pm
• Business News
• 176 Views

کوئٹہ: حکومت بلوچستان نے پبلک ٹرانسپورٹ کھولنے کی اجازت دے دی، پبلک ٹرانسپورٹ ایس او پیز کے تحت چلانے کی اجازت دی گئی۔

تفصیلات کے مطابق حکومت بلوچستان کی جانب سے پبلک ٹرانسپورٹ سروس بحال کرنے کی اجازت سے متعلق نوٹیفکیشن جاری کر دیا گیا۔نوٹیفکیشن میں کہا گیا ہے کہ ٹرانسپورٹرز بسوں میں جراثیم کش اسپرے کرنے کے پابند ہوں گے جبکہ کوچز میں سماجی فاصلوں کو برقرار رکھتے ہوئے مسافر کے ساتھ سیٹ خالی ہوگی۔

نوٹیفکیشن میں کہا گیا ہے کہ بسوں میں سینیٹائزر کی دستیابی یقینی بنائی جائے گی جبکہ پبلک ٹرانسپورٹ میں سفر کرنے والے مسافروں کی اسکیننگ کی جائے گی۔

حکومت بلوچستان کی جانب سے جاری نوٹیفکیشن میں کہا گیا ہے کہ بخار میں مبتلا اور ماسک کے بغیر بس میں کسی کو سوار ہونے کی اجازت نہیں ہوگی جبکہ ٹیکسی میں تین سے زائد افراد کو سفر کرنے کی اجازت نہیں ہوگی۔

نوٹیفکیشن میں مزید کہا گیا ہے کہ ایس او پیز کی شدید خلاف ورزی کی صورت میں ٹرانسپورٹ دوبارہ بند کی جاسکتی ہے اور ایس او پیز کی خلاف ورزی کرنے والے ٹرانسپورٹرز اور مسافروں کے خلاف کارروائی ہوگی