بارشوں کا ساتواں اسپیل ، کراچی والے ایک بار پھر تیار ہوجائیں

بارشوں کا ساتواں اسپیل ، کراچی والے ایک بار پھر تیار ہوجائیں

• August 28, 2020, 9:56 pm
• Weather News
• 154 Views

کراچی : محکمہ موسمیات نے 30 اگست سے کراچی سمیت سندھ بھر میں مون سون بارشوں کا ساتواں اسپیل شروع ہونے کی پیش گوئی کردی ہے اور کہا ہفتہ سے پیر کے دوران موسلادھار بارش متوقع ہے۔

تفصیلات کے مطابق محکمہ موسمیات نے کراچی سمیت سندھ بھر میں ساتویں اسپیل کی پیشگوئی کردی اور کہا 30 اگست سے پاکستان میں مون سون بارشوں کا نیا اسپیل شروع ہوگا۔

محکمہ موسمیات کا کہنا ہے کہ مون سون کا ایک اور سسٹم ہفتہ کو سندھ میں داخل ہونے کا امکان ہے، جس کے باعث ہفتہ سے پیر کے دوران کراچی ،حیدرآباد،ٹھٹھہ،بدین،داددمیں موسلادھار بارش متوقع ہے۔

محکمہ موسمیات نے کراچی،حیدرآباد،ٹھٹھہ،میرپورخاص اوربدین میں ایک بار پھراربن فلڈنگ کا خدشہ ظاہر کرتے ہوئے کہا ہے کہ تھر پارکر، نگرپارکر، میرپورخاص،اسلام کوٹ،سانگھڑ،سکھر،لاڑکانہ میں بھی بارش متوقع ہے۔

چیف میٹرلوجسٹ کا کہنا ہے کہ کراچی میں بارش کا کمزور سسٹم موجود ہے، جس کے باعث کہیں تیز اور کہیں ہلکی بارش کا امکان ہے جبکہ آج ایک اور ہیوی اسپیل ٹھٹھہ میں تیز بارش کا سبب بنے گا۔

کراچی میں آئندہ 2 روز مطلع ابرآلود رہے گا جبکہ وقفے وقفے سے بارش کا امکان ہے ، آج زیادہ سے زیادہ درجہ حرارت 32 ڈگری سینٹی گریڈ تک ریکارڈ کیا گیا۔

خیال رہے گذشتہ روز کراچی میں ہونے والی طوفانی بارش کے باعث مختلف حادثات میں خواتین اور بچوں سمیت کم از کم 18 افراد جاں بحق ہوچکے ہیں۔

محکمہ موسمیات کے مطابق شام تک 200 ملی میٹر سے زیادہ بارش ہو چکی ہے جبکہ بارش کا یہ سلسلہ جمعے تک جاری رہ سکتا ہے، متاثرہ علاقوں میں پانی کی نکاسی کا کام اور امدادی سرگرمیاں جاری ہیں جن میں سول انتظامیہ کے ساتھ فوجی جوان بھی شریک ہیں۔

سندھ حکومت نے بارش کے سیلابی صورتحال کے پیشِ نظر جمعے کو تعطیل کا اعلان کیاجبکہ کراچی سمیت سندھ بھر میں ’رین ایمرجنسی‘ بھی نافذ ہے۔